Andvari, rit Hins íslenska þjóðvinafélags, er kominn út. Að þessu sinni er engin löng ævisaga sem höfuðgrein ritsins og þar af leiðandi hefur kápan breyst lítillega. Sem fyrr er Andvari fullur af menningarlegu og þar á meðal ævisagnalegu efni. Fræðigreinar á sviði sagnfræði, bókmennta og málfræði eru mest áberandi en einnig má í heftinu finna þrjár textaútgáfur. Ritstjóri Andvara er Ármann Jakobsson. Þetta er 151. árgangur Andvara en hinn 68. í nýjum flokki. Ritið er að þessu sinni 278 síður. Aðsetur ritsins er nú hjá Háskólaútgáfunni.

Aðalfundur Hins íslenska þjóðvinafélags var haldinn í Alþingishúsinu, fundarsal Alþingis, fimmtudaginn 5. febrúar 2026. 

Hið íslenska þjóðvinafélag varð 150 ára árið 2021 og var þess minnst með atburði fyrir börn í Alþingishúsinu og veglegri ráðstefnu í Grósku. Frá þessum atburðum hefur áður verið sagt. En stjórninni þótti mikilvægt að minnast fleiri afmæla. Félagið hefur gefið út tvö rit lengst af starfstímanum. Því var fagnað 10. apríl 2025 að 150 ár voru liðin frá því að þau komu fyrst út.